Os Imperfectos presentan 'Hai Algo Máxico', adianto do seu álbum debut
Por Redacción
A banda vilagarciá Os Imperfectos vén de lanzar 'Hai Algo Máxico', o primeiro single do seu álbum debut 'Supernova'.
Este grupo, formado por Juan Carballo, Álvaro Cardalda e Pedro Falcón, nace en 2021 tras colaboraren nas xiras do poeta e músico Juan Carballo.
O single 'Hai Algo Máxico' está dispoñible en todas as plataformas dixitais dende o 30 de agosto e o videoclip está protagonizado por Carla Rivas, actriz da premiada película 'O Corno'.
'Supernova' contará con oito cancións que se irán publicando ao longo dos próximos meses.
O álbum foi gravado e producido integramente en Galicia, entre Vilaxoán e Santiago de Compostela.
Os Imperfectos definen o seu proxecto como unha "particular aposta pola música e poesía en galego" e aspiran a chegar ás mellores salas e festivais do país durante o curso 2024/25.
O grupo conta tamén coa colaboración de músicos de sesión como Pepe Santamaría (batería) e Rubén Iglesias (baixo) para as gravacións e actuacións en directo.
Con este lanzamento, os integrantes de Os Imperfectos inician unha nova etapa na súa carreira musical, apostando por unha produción 100% galega e prometendo unha 'gran Supernova' para os vindeiros meses.