A Cantiga de Caldas de Alfonso X 'O Sabio' transfórmase nun documental
Por Redacción
A Cantiga de Caldas de Alfonso X 'O Sabio' ten xa un documental propio. O traballo audiovisual, patrocinado polo departamento de Cultura do Concello de Caldas de Reis, foi presentada no Auditorio Municipal.
Trátase dun proxecto impulsado polo músico Miguel Fariña que ten como obxectivo divulgar a lenda do milagre da Virxe Santa María acontecido na vila termal recollido na 'cantiga 104' do Rei Sabio.
Na súa presentación participaron ademais do alcalde Juan Manuel Rey e o tenente de alcalde e edil de Cultura, Manuel Fariña, integrantes do grupo de música antiga Martín Códax, participantes da gravación.
A obra contou coa participación de Monseñor Francisco Froján, o grupo de teatro Carauta e persoas expertas da Universidade de Santiago de Compostela. Todos eles achegan a súa visión sobre o milagre de Santa María de Caldas, un dos catro milagres eucarísticos incluídos nas Cantigas.
"Para Caldas estar involucrada nestas iniciativas é unha maneira de poñerse en valor e estar no mapa de municipios interesados pola cultura e o seu patrimonio", afirmou Manuel Fariña lembrando que o municipio se incorporou hai tempo á Comisión de Pobos e Cidades Alfonsíes, creada pola FEMP, co obxectivo de dar a coñecer o vínculo de Caldas de Reis coas Cantigas de Santa María e divulgar esa vinculación entre a veciñanza, persoas visitantes e peregrinas que transiten pola localidade en dirección a Compostela.