'Tiqtoqueiras', novo espectáculo da Aula de Teatro Municipal de Pontevedra, preséntase este sábado en Lérez
Por Redacción
A Aula de Teatro Municipal de Pontevedra (ATM) inicia unha xira polas parroquias de Pontevedra para presentar o último espectáculo creado neste espazo de formación interpretativa, que depende da concellería de Cultura do Concello de Pontevedra.
A obra titúlase 'Tiqtoqueiras' e será representada este sábado 8 de xuño, ás 19.30 horas, na Casa da Cultura de Lérez.
O sábado 15 de xuño a función realizarase no Centro Social dos Campos, en Mourente, a partir das 21.30 horas.
Ambas as funcións son de entrada libre e gratuíta ata completar a capacidade dos recintos.
'Tiqtoqueiras' é un espectáculo escrito polas intérpretes afeccionadas que integran o elenco, composto por 15 actrices e un actor, con idades comprendidas entre os 25 e os 65 anos.
Ambientada nun manicomio virtual, a obra ofrece unha reflexión cómica sobre as diferentes dependencias que se derivan do uso permanente e enfermizo das redes sociais.
A montaxe ofrece humor, música e crítica social, adaptada a público de todas as idades.
TRAXECTORIA DA ATM
A Aula de Teatro Municipal de Pontevedra é un espazo de formación teatral polo que deron os seus primeiros pasos escénicos intérpretes como Bea Campos, Pia Nicoletti, Santi Cuquejo, a cantante Laura Cruxeiras ou o actor de dobraxe Antonio Morillo.
Desde a súa formación obtivo premios en certames teatrais de Galicia e tamén do Estado como en Reinosa (Cantabria) ou Villacañas (Toledo).
A ATM colabora habitualmente nas montaxes da formación Os de Algures e desenvolveu propostas escénicas como 'Rúas con Memoria', a partir de textos da escritora Montse Fajardo, sobre mulleres pontevedresas represaliadas.
Relacionadas:
-
As rúas de Pontevedra non esquecen ás mulleres represaliadas
Por Redacción |
-
A Aula de Teatro Municipal de Pontevedra estrea 'Chumbalagatas' en Raxó este sábado
Por Redacción |
-
Casto Sampedro, protagonista da última "superprodución" de Os de Algures
Por Alejandro Espiño |
-
Veredicto: culpables de facer teatro
Por Mónica Patxot |
-
A Aula de Teatro Municipal estrea "Banqueiros" no Centro Cultural de Monte Porreiro
Por Mónica Patxot |