Un lume nun terreo de matogueiras esperta a alarma nocturna no Burgo
Por Diego Torrado
Un incendio declarado pouco despois das 22.00 horas deste domingo espertou todas as alarmas no barrio pontevedrés do Burgo. As lapas afectaron a un terreo de matogueiras situado na zona traseira do pavillón municipal de deportes.
Fontes do Corpo de Bombeiros de Pontevedra indicaron que a alerta do lume chegou a través dunha chamada cidadá ao Centro de Atención de Emerxencias 112 ás 22.18 horas. Ao lugar desprazáronse inmediatamente dúas dotacións dos servizos municipais de extinción e as policías Local e Nacional.
Testemuñas presenciais indicaron que o lume se iniciou de forma repentina en no medio do terreo e arrasou practicamente toda a zona de matogueiras do terreo. Está situada entre o pavillón e a igrexa de Santiago do Burgo e, ao parecer, fora obxecto de tarefas de limpeza recentemente.
O lume xerou grande expectación entre os veciños da zona, que se mobilizaron ante a visión de lapas de grande altura e polo despregamento de medios que xerou no medio da noite. Veciños consultados indicaron que ten visos de tratarse dun incendio provocado.