A Policía implica os comerciantes no dispositivo por unhas rebaixas seguras
Por Redacción
A Policía Nacional implicou os comerciantes da cidade no dispositivo especial de seguridade posto en marcha, como cada ano, para a prevención dos pequenos furtos durante o período de rebaixas. A delegada de Participación Cidadá da Comisaría, Ruth Martín, mantivo reunións con diferentes asociacións de comerciantes co fin de saber que acollida está a ter o devandito dispositivo entre os comerciantes, se o seu desenvolvemento é satisfactorio ou identificar delincuentes habituais.
Ruth Martín recolleu as impresións do presidente de comerciantes das Galerías da Oliva, David Neira; a presidenta da Asociación de Comerciantes de Loureiro Crespo, María Diz; e o presidente do Centro Comercial Urbano Zona Monumental, Miguel Lago.
O obxectivo das reunións é coñecer de primeira man as súas impresións sobre o dispositivo de prevención establecido pola Policía Nacional. Segundo informou a Comisaría, todos están de acordo en que "o dispositivo está a ser efectivo" e destacou a colaboración entre a Policía Nacional e os responsables dos distintos negocios.
Os representantes dos comerciantes recibiron consellos para previr furtos. A Policía Nacional recorda que os seus establecementos son un dos escenarios máis frecuentes dos amigos do alleo. Mentres clientes e empregados atenden aos seus intereses, os descuideros encontran máis facilidades para, con pericia e astucia, subtraer os efectos dos primeiros ou os obxectos que se encontran expostos para a súa venda ao público.
Por iso, aconsellan que se deberá prestar especial atención nos momentos en que varias persoas entran en grupo e algunha acapara a atención dos empregados. Non hai que perder nunca de vista a caixa rexistradora, aínda que haxa que desprazarse pola tenda para atender o requirimento dalgún cliente, e, se for posible tampouco dos obxectos expostos no comercio.