Urbanismo de Sanxenxo outorgará as licenzas de obra menor en 15 días
Por Redacción
O Goberno local de Sanxenxo axilizará e simplificará a obtención de licenzas de obra menor promovendo un proceso abreviado de concesión de autorización por actuación comunicada. Así está recollido na ordenanza reguladora do procedemento de tramitación de licenzas urbanísticas e de intervención administrativa no exercicio de actividades que o Executivo sanxenxino someterá en breve a consideración do Pleno da Corporación.
Tal e como explicou a concelleira de Urbanismo, María Deza, serán as actuacións de reducido impacto urbanístico ou repercusión ambiental e escasa entidade técnica as que poderán realizarse coa mera comunicación á Administración da intención de levalas a cabo. Iso si, deberán poñerse en coñecemento da Xerencia Municipal de Urbanismo cunha antelación mínima de quince días hábiles á data na que estea proxectado o inicio dos traballos, ademais de presentar a documentación esixida en función do tipo de intervención prevista.
Pola súa banda, quedarán excluídos do ámbito de aplicación deste proceso abreviado os traballos cuxa execución requira da emisión de informes sectoriais ou de autorizacións previas por parte doutras Administracións ou organismos públicos, ademais daqueles que afecten a inmobles declarados como Ben de Interese Cultural, que se encontren catalogados ou inventariados; e as accións que precisen da instalación de estadas de máis de seis metros de altura ou elementos equivalentes.