O 12 de xuño estará operativo o treito do AVE entre Pontevedra e Arcade
Por Oskar Viéitez
O vindeiro 12 de xuño estará operativo o treito do AVE entre Pontevedra e Arcade, de nove quilómetros de lonxitude. A noticia foi avanzada polo xerente de Cercanías de Galicia ao comité de empresa na provincia de Pontevedra de RENFE-Operadora.
Desde o Adif informan que de xeito progresivo iranse desviando os trens e os distintos dispositivos de seguridade da vía actual á nova ao longo de varios días. Isto podería orixinar algún atraso, especialmente, durante a fin de semana do 8 e 9 de xuño.
Mentres tanto as empresas adxudicatarias do Eixo Atlántico de alta velocidade ultiman os traballos para a posta en marcha deste tramo, por exemplo no paso do ferrocarril pola rúa Ramón Otero Pedraio, que estará pechada unha semana máis para cambiar as tubaxes de abastecemento de auga que discorren polo eixo da vía actual.
O novo treito do AVE entre Pontevedra e Arcade deixará sen uso a antiga ponte do Lérez, xunto á praia fluvial, e tamén ao seu túnel.
Desde o Concello propúxose a idea de transformar a vella ponte para o seu uso peonil cegando por completo o túnel adxacente.