Defensa inicia en Pontevedra o proceso para cubrir 3.000 prazas de militares profesionais
Por Redacción
Ata o próximo 25 de xuño está aberto o prazo para anotarse ao novo proceso selectivo que abriu o Ministerio de Defensa para cubrir 3.000 prazas para militares profesionais de tropa e mariñeiría.
En Pontevedra este proceso, baixo o réxime concurso-oposición, será coordinado pola área de Recrutamento da Subdelegación de Defensa. Para poder participar requírese ter entre 18 e 29 anos, carecer de antecedentes penais ou ter aberto procedemento xudicial por delito doloso ou posuír, como mínimo, o graduado en ESO.
Para participar no proceso selectivo é necesario solicitar cita previa. Dita solicitude de cita poderase realizar persoalmente ou por correo certificado na Subdelegación de Defensa, por vía telefónica nos números 902432100 e 913089798 ou a través da páxina web do Ministerio de Defensa.
As prazas distribúense entre o Exército de Terra (2.200), a Armada (450) e o Exército do Aire (350). Das prazas para o Exército de Terra, os estranxeiros de países cos que se ten un convenio de colaboración, poden optar a 66 en concorrencia cos nacionais.
Desas prazas, en Galicia e zonas próximas, o Exército de Terra convoca para unidades da Brigada de Infantería Lixeira Galicia VII (Brilat), 50 en Figueirido (Pontevedra) e 50 en Siero (Asturias).
A Armada convoca 80 prazas para buques e unidades da zona norte (Ferrol, Tui, Marín, San Sebastián, Bilbao). Pola súa banda, o Exército do Aire convoca 7 prazas das cales 1 é para o Aeródromo Militar de Santiago (A Coruña), 1 para o Escuadrón de Vixilancia Aérea número 10 en Noia (A Coruña) e 5 para a Academia Básica do Aire en León.