Pontevedra protesta pola supresión das desconexións locais na Radio Galega
Por Alejandro Espiño
O goberno municipal expresou este luns a súa oposición á decisión da dirección da CRTVG de suprimir as desconexións locais nos informativos da Radio Galega.
A decisión, que será efectiva en setembro, reducirá a presenza de Pontevedra nas noticias da radio pública galega, segundo denuncian os sindicatos e os traballadores, que iniciaron unha recollida de firmas para frear esta medida.
Varios concellos galegos, entre eles Vigo e Santiago, aprobaron xa diferentes mocións para mostrar o seu rexeitamento á redución da información local na Radio Galega. A eles súmase agora Pontevedra.
O Concello, a través da Xunta de Goberno, aprobou unha declaración institucional na que insta á CRTVG para manter estas desconexións, actualmente compartidas con Vigo, ao entender que a súa supresión atenta contra o dereito fundamental de acceso á información que debe primar nun servizo público como o que ofrece a Radio Galega.
O portavoz municipal, Raimundo González, engadiu que esta petición faise extensible á desaparición do Diario Cultural, como programa con entidade propia, da programación da radio pública galega.
Rexeitan así, dixo González, a presenza "residual" da información cultural que a Radio Galega ofrecerá aos seus oíntes para partir do próximo mes de setembro.
Desde a dirección da CRTVG negan que se vaia a suprimir o Diario Cultural ou as desconexións locais dos informativos e indican que en ambos os casos o que hai é un "cambio de estrutura" e que tanto a información cultural como local gañarán tempo de emisión ao longo de todo o día, incluído a fin de semana.
Relacionadas:
-
Pontevedra seguirá sen delegación da CRTVG ante o "veto" do PP á súa reapertura
Por Redacción |
-
O BNG solicita que a delegación da radio e televisión galega volva a Pontevedra
Por Oskar Viéitez |
-
En Marea esixe á Xunta a reapertura da delegación da CRTVG en Pontevedra
Por Redacción |
-
A TVG non "tomará ningunha medida" para dar máis cobertura informativa ao concello de Pontevedra
Por Redacción |
-
O pleno de Pontevedra declara á TVG como "medio de comunicación partidista e hostil" coa cidade
Por Redacción |