O envorco dun camión complica o tráfico no Piñeiro, en Vilagarcía
Por Redacción
Un camión envorcou na tarde deste mércores en Vilagarcía de Arousa e perdeu parte da carga, de modo que provocou complicacións de tráfico na estrada N-640.
O sinistro produciuse ao redor das 14.30 horas na chamada rotonda do Piñeiro, na ligazón ao porto de Vilagarcía, e o camión quedou envorcado no medio da glorieta, caendo ao chan parte dos taboleiros de madeira que transportaba.
Ata o lugar desprazáronse dotacións de Protección Civil e os Bombeiros de Vilagarcía, así como o 061 e a Garda Civil de Tráfico, que tivo que regular a circulación pola zona e mesmo pechar un dos carrís da rotonda.