Doce horas no vestíbulo do Hospital para amosar a oposición ao peche de camas no verán
Por Mónica Patxot & Anxo Lourido
Representantes sindicais da Xunta de Persoal dos hospitais públicos de Pontevedra encerráronse este martes no vestíbulo do Hospital Provincial para manifestar a súa oposición ao peche de camas que a xerencia estuda para este verán. O encerro comezou ás 10.00 para rematar ás 22.00 horas.
Trátase do segundo acto de protesta que a Xunta de Persoal leva a cabo durante esta semana, despois de protagonizar este luns dúas concentracións, no Provincial e Montecelo, reclamando información ao Sergas sobre os departamentos que ten previsto deixar sen actividade en ambos os centros a partir de xuño.
A presidenta da Xunta de Persoal, Emma Rodríguez e o secretario Jorge Castelo atopábanse á fronte da protesta. Ambos esperan que o xerente José Ramón Gómez ofreza no encontro que vai manter coa Xunta de Persoal este xoves as cifras exactas das camas que se van a pechar.
Nunha reunión previa, o xerente evitou ofrecer estes datos alegando que o Sergas non lle autorizaba a facilitarllos aos representantes dos traballadores, a pesar de que xa se está trasladando á persoal información sobre os cambios previstos para os próximos meses por este motivo.
O encontro cos membros da xerencia conta con máis de cincuenta puntos na orde do día, afirman os representantes sindicais, debido á cantidade de temas pendentes de resolución.
Emma Rodríguez e Jorge Castelo afirman o malestar que existe, principalmente, entre persoal médico e de enfermería. Entre outros factores, sinalan que ata hai un ano se establecían tres meses para organizar as quendas de vacacións e para este 2018 a xerencia, de maneira unilateral, decidiu ampliar esta rotación ao mes de xuño.
Apuntan tamén a que os profesionais sanitarios galegos non están a ser valorados polo Sergas e, por este motivo, os máis novos emigran en busca de estabilidade no emprego a países de Europa do norte, onde atopan mellores condicións laborais e salariais.
Relacionadas:
-
RADIO.- "Os hospitais non se paralizan no verán. Traballamos co persoal que dispoñemos e priorizamos intervencións"
Por Marisa Ciordia |
-
A xerencia dos hospitais de Pontevedra confirma o peche de 80 camas durante dous meses
Por Redacción |
-
CCOO denuncia as continuas avarías dos elevadores do Hospital Provincial
Por Oskar Viéitez |
-
A Xunta de Persoal dos hospitais de Pontevedra inicia as protestas contra o peche de camas no verán
Por Miguel Álvarez Fandiño & Anxo Lourido |
-
A Xunta de Persoal dos Hospitais de Pontevedra vai pecharse durante 12 horas no Provincial
Por Miguel Álvarez Fandiño & Anxo Lourido |