Poio busca bolseiros para as súas oficinas de turismo
Por Oskar Viéitez
Un ano máis as oficinas de turismo do Concello de Poio contarán cun amplo número de profesionais do sector entre persoal propio, subvencionado ou contratado por distintas administracións, así como os bolseiros titulados.
O concelleiro de Turismo, Xosé Luís Martínez Blanco, informou sobre o inicio do proceso selectivo de dúas bolsas de práctica destinadas a titulados en turismo para realizar tarefas de práctica laboral nas oficinas municipais durante a Semana Santa e a tempada estival.
As solicitudes para participar no proceso terán de prazo dende o 22 de febreiro ata o 28 do mesmo mes (ambos días inclusive) e poderán ser presentadas tanto no rexistro xeral do Concello de Poio como en calquera das formas establecidas no artigo 16.4 da lei 30/2015.
Os aspirantes seleccionados realizarán as súas prácticas durante máis de catro meses nas oficinas de turismo municipais, dando comezo ao período de práctica na vindeira Semana Santa e reincorporándose logo de cara á tempada de verán.