A Xunta aproba a expropiación de terreos en Poio para crear a senda entre Covelo e Raxó
Por Redacción
O Consello da Xunta declarou este xoves de utilidade pública os terreos necesarios para construír a senda peonil e ciclista na estrada PO-308, entre Covelo e Raxó, no municipio de Poio. Desta forma, aprobouse o decreto para levar a cabo as expropiacións.
O decreto, aprobado polo goberno da Xunta de Galicia, supón a ocupación de 46 leiras, que alcanzan un custo de preto de 42.000 euros. O orzamento total da obra alcanzará unha cifra superior aos 2 millóns de euros.
Segundo expón o goberno autonómico, a actuación atende a demanda veciñal para completar unha vía segura entre a travesía de Samieira, no acceso ás praias e ao porto de Covelo, ata o final da travesía de Raxó, onde están conectadas coas beirarrúas que se atopan en Dorrón.
A senda prevista contará con 3,7 quilómetros e o proxecto contempla a dotación de zonas de aparcadoiro nos espazos en que sexa posible, ademais de sistemas de recollida de augas de drenaxe.
Tamén se acometerá a extensión dunha capa de rodaxe no tramo inicial da travesía de Raxó; a renovación da sinalización e a recolocación da iluminación en varios tramos.
Con esta obra quérese garantir a seguridade dos viandantes e dos ciclistas que circulan por esta zona. A Xunta de Galicia licitará nas próximas semanas a obra de creación da senda. Ademais, dentro deste ano tamén quere eliminar os "puntos negros" nesta estrada.
Relacionadas:
-
A Xunta convoca aos afectados polas expropiacións da senda entre Covelo e Raxó
Por Redacción |
-
A Xunta espera iniciar as obras da senda entre Covelo e Raxó a finais deste verán
Por Oskar Viéitez |
-
A Xunta asumirá as alegacións de Pedaladas para mellorar a senda da Seca a Combarro
Por Oskar Viéitez |
-
A Xunta resposta ás críticas dos ciclistas defendendo a "mellora da seguridade" na PO-308
Por Oskar Viéitez |
-
O PSOE leva ao Parlamento a denuncia de inseguridade viaria na PO-308 e as demandas de Pedaladas
Por Redacción |
-
Tres glorietas en Samieira, Covelo e Raxó para mellorar a seguridade da PO-308
Por Redacción |