Fenosa pode soterrar "cando queira" a liña de alta tensión de Monte Porreiro
Por Alejandro Espiño
Gas Natural Fenosa pode empezar as obras para soterrar a liña de alta tensión de Monte Porreiro "cando queiran". Así o asegurou este luns o portavoz do goberno municipal, Raimundo González, que desvelou que a empresa conta coa autorización necesaria desde hai un mes e medio.
"Se non empezan é porque non queren", engadiu o edil do BNG, que saíu ao paso das recentes declaracións do PP, que afirmaba que as obras eran inminentes e que tan só restaba a concesión da licenza por parte do Concello.
Aínda que non quixo explicar as razóns polas que, segundo a súa opinión, Fenosa está a atrasar o inicio destes traballos, Raimundo González detallou o proceso administrativo que seguiu este asunto desde que o pasado 22 de xuño o proxecto fora visado polo colexio profesional.
Non foi ata tres meses despois, o 21 de setembro, cando esta intervención foi presentada no Concello de Pontevedra. O informe do xefe da oficina técnica municipal emitiuse o 18 de outubro e, o 20 de novembro, deron a súa autorización tanto a Consellería de Medio Ambiente como Augas de Galicia.
Tras constituír a fianza, Gas Natural Fenosa recibiu a autorización do Concello o 14 de decembro. Con este trámite, segundo González, a empresa xa pode comezar a soterrar toda a liña de alta tensión, desde a estación eléctrica ao final da urbanización de Monte Porreiro.
O portavoz do goberno municipal reitera que a empresa ten "vía libre" para acometer estes traballos, "outra cousa é que lle interese retrasalos". Aí circunscribe o Concello o recurso presentado por Fenosa á autorización municipal, igual a todas as que se outorgan ás obras que ocupan vía pública, e coa que a empresa parece non estar conforme.
En todo caso, Raimundo González lembrou que este soterramento é unha demanda histórica do barrio de Monte Porreiro e engadiu que os veciños non poden ser "responsables" de que Fenosa decida atrasar a obra "ata cando lles conveña".
LICENCIA EDIFICIO BENITO CORBAL
Ademais, nos "próximos días" o Concello outorgará licenza para a rehabilitación integral da antiga delegación da Xunta de Galicia na rúa Benito Corbal.
O portavoz municipal explicou que os servizos técnicos do Concello están a ultimar os trámites para a autorización. Explicou, en todo caso, que non se produciron atrasos na súa tramitación, xa que o proxecto presentouse na sede municipal hai dous meses.
Relacionadas:
-
O soterramento da liña de alta tensión de Monte Porreiro obriga a cortar un carril da rúa Portugal
Por Redacción |
-
A liña de alta tensión de Monte Porreiro estará soterrada a finais de ano
Por Alejandro Espiño & Mónica Patxot |
-
Primeiros de marzo, data para iniciar o soterramento da liña de alta tensión en Monte Porreiro
Por Alejandro Espiño |
-
Fenosa fixa para finais de marzo as obras para soterrar a liña de alta tensión de Monte Porreiro
Por Redacción |
-
O PP anuncia o "inminente" inicio do soterramento da liña de alta tensión de Monte Porreiro
Por Oskar Viéitez |
-
Toda a corporación municipal urxe o soterramento do transformador en Monte Porreiro
Por Oskar Viéitez |
-
Marea pide soterrar o transformador eléctrico de Monte Porreiro
Por Redacción |
-
Bará pide á Xunta que obrigue a Fenosa a soterrar a liña de alta tensión de Monte Porreiro
Por Redacción |