Os mundiais de tríatlon de 2019, centro da promoción de Pontevedra en Fitur
Por Alejandro Espiño
Pontevedra converterase en 2019 na capital mundial do tríatlon. A Boa Vila acollerá o denominado ITU Multisport Festival, un evento que agrupa os campionatos do mundo de dúatlon, acuatlón, tríatlon cros e tríatlon de longa distancia. E o Concello está decidido a aproveitalo ao máximo, converténdoo nun eixo estratéxico da súa promoción turística.
Tras anos sen presenza específica en Fitur, a maior feira turística de España, Pontevedra presentará en Madrid esta cita deportiva. Será o vindeiro xoves 18 de xaneiro. Ata alí trasladarase o alcalde, Miguel Anxo Fernández Lores, e a concelleira de Deportes, Anxos Riveiro. Estarán convidados, ademais, numerosos deportistas e personalidades galegas.
Ademais, Pontevedra aproveitará esta cita feiral para contactar con empresas que están interesadas en converterse en patrocinadores desta cita deportiva. Tamén haberá contactos con operadores de turismo e xornalistas especializados.
O acto, que terá lugar na caseta de Turismo de Galicia, desvelará a imaxe do ITU Multisport Festival e aproveitarase para estrear o vídeo promocional e os folletos en papel que se encargou para publicitar este campionato.
Anxos Riveiro explicou que a presenza do Concello en Madrid forma parte da planificación que se deseñou para aproveitar turisticamente a celebración destes catro mundiais en Pontevedra e ao que acudirán numerosos deportistas de Europa, Estados Unidos, Australia ou Xapón, entre outros, polo que o retorno económico pode ser notable.
Así, están a estudarse novos eventos en localidades vinculadas co mundo do tríatlon como Barcelona ou Eivissa, aínda que aínda estar por concretarse.
A edil de Deportes explica que este esforzo enmárcase dentro da convicción que existe no goberno municipal de que estes eventos deportivos contribúen a promocionar turisticamente Pontevedra, posicionándoa como destino para todas aquelas persoas que, ademais de visitala, aproveitan para adestrar ou gozar dun tempo de lecer ao aire libre.
Relacionadas:
-
O Multisport Festival e o Mundial Junior de Balonmán 2019, eventos de "excepcional interese público"
Por Diego Espiño | Creada e actualizada
-
Queres ser voluntario no Mundial de Triatlón de 2019?
Por David Arana |
-
As máximas autoridades deportivas apoian a Pontevedra na presentación do ITU Multisport Festival 2019
Por Redacción |
-
O ITU Multisport Festival 2019 de Pontevedra define a súa estratexia de comunicación
Por Redacción |
-
Sanxenxo, presente un ano máis en Fitur
Por Redacción |
-
O patrimonio será eixo da promoción das Rías Baixas en Fitur
Por Oskar Viéitez |
-
Un 2018 "extraordinario" a nivel deportivo traerá a máis de 40.000 persoas a Pontevedra
Por Alejandro Espiño |
-
"As sensacións son boas" tras a avaliación Federación Internacional Tríatlon
Por Redacción |
-
A Federación Internacional de Tríatlon pasa revista a Pontevedra para o ITU Multisport Festival 2019
Por Diego Espiño |