Sogama instrúe en Marín cara un consumo responsable e con menos residuos
Por Redacción
Poñer en práctica toda unha serie de xestos cos que xerar menos lixo nos fogares e levar a cabo un consumo responsable. Ese é o espírito co que Sogama inaugurou a exposición Menos residuos, máis recursos en Marín.
A mostra foi visitada pola alcaldesa de Marín, María Ramallo, que estivo acompañada polo presidente de Sogama, Javier Domínguez Lino.
Promovida por Sogama, en colaboración coa Consellería de Medio Ambiente e Ordenación do Territorio, a exposición situouse na alameda, onde permanecerá ata o 14 de xaneiro. Está integrada por varios tótems e un panel central nos que se difunde, a través de textos e imaxes, diversos consellos e recomendacións.
A pretensión é trasladar ao cidadán a importancia da prevención e a redución como principal soporte na xestión sustentable dos residuos, que en todo caso deben ser complementadas coa reutilización e a reciclaxe.
Isto último só é posible, destacan desde Sogama, se tivo lugar unha separación previa dos distintos materiais presentes no lixo e posterior depósito dos mesmos nos colectores adecuados.
Comprar con cabeza e facer unha lista previa do que realmente se precisa, optar por produtos locais e de tempada, dar preferencia aos bens de longa duración e con posibilidades de ser reparados ou recuperar o tradicional carro da compra e levar a bolsa de casa son algúns dos consellos que traslada esta mostra.
Ademais, propoñen evitar os sobreempaquetados e adquirir artigos a granel, doar a roupa usada a entidades sociais, apostar por pilas recargables, comprobar a data de caducidade dos produtos perecedoiros, revisar a neveira e a despensa, axustar as racións ao número de comensais ou aproveitar as sobras para a elaboración de novos menús.
Con estes sinxelos xestos, sinalan desde Sogama, os cidadáns de Marín poderán contribuír, desde a responsabilidade, a un futuro máis sustentable, propiciando o tránsito desde unha economía lineal a unha circular que garanta a preservación dos xa escasos e limitados recursos naturais.
Relacionadas:
-
Marín estuda cinco zonas semiurbanas para instalar composteiros comunitarios
Por Redacción |
-
Os alumnos da Escola de Enxeñería Forestal coñecen o proxecto de ampliación de Sogama
Por Redacción |
-
Dez consellos de Sogama para un consumo responsable en Nadal
Por Redacción |
-
Catorce colexios de Pontevedra participarán no programa Recíclate con Sogama
Por Redacción |
-
Sogama recibe o certificado Ardán de Empresa de Alta Produtividade 2017
Por Redacción |