Interveñen 800 pares de zapatillas deportivas con etiquetas falsas en Vilanova de Arousa
Por Redacción
A Garda Civil de Pontevedra interveu nos últimos días dúas partidas de calzado falsificado en Vilanova de Arousa, sacando do mercado preto de 800 pares de zapatillas deportivas con etiquetas falsas cuxo valor no mercado alcanzaría os 75.000 euros.
Segundo informou a Garda Civil, as zapatillas estaban expostas para a venda ao público na festa de San Simón, que se celebrou no lugar de Baión, en Vilanova. Localizáronas efectivos da Patrulla Fiscal e de Fronteiras da Garda Civil de Vilagarcía de Arousa.
En concreto, as zapatillas estaban en dous postos de venda. Os gardas civís comprobaron que os responsables dos postos ambulantes carecían da correspondente factura de compra das pezas, así como da preceptiva autorización da marca rexistrada afectada.
A Garda Civil procedeu á incautación preventiva de todas as pezas: 394 zapatillas nun posto e 373 zapatillas no outro. Ademais, instruíronse dilixencias por un presunto delito contra a propiedade industrial, que foron entregadas no xulgado de garda de Vilagarcía de Arousa.