A Fiscalía pide 14 anos de cárcere para dous homes por tentar matar o tío dun deles
Por Oskar Viéitez
No banco dos acusados da sección cuarta da Audiencia de Pontevedra sentarán o vindeiro martes dous homes acusados de tentar matar o tío dun deles disparándolle cunha escopeta a uns seis metros de distancia.
O tiro alcanzou á vítima na rexión occipital esquerda da súa cabeza, sen afectación ao cranio nin masa encefálica. O ferido puido baixar do coche e viu a un dos acusados. Dirixiuse cara a el correndo, deixando un reguero de sangue polo camiño.
Sucedeu no Porriño, en maio de 2016, a vítima acababa de subir ao coche e os dous procesados esperábano agochados detrás duns setos fronte á súa vivenda.
A Fiscalía pide 14 anos de cárcere para cada un deles por un delito de homicidio en grao de tentativa.
Ademais o representante do Ministerio Público pide que se lles impoña a prohibición de achegarse a menos de 500 metros do ferido e comunicarse con el por un período de 15 anos.
Os procesados atópanse en prisión provisional desde o que se produciu o tiroteo.