A Escola de Enfermería acolle un obradoiro de atención para menores trans
Por Oskar Viéitez
A presidenta da Deputación de Pontevedra, Carmela Silva, acompañada pola deputada de Cohesión Social e Xuventude, Digna Rivas, maila deputada responsable da Escola de Enfermería, Eva Vilaverde, presentou este martes neste centro o módulo "Atención sanitaria transpositiva aos e ás menores con identidades sexuais non normativas"
O curso impárteo este martes mais o vindeiro martes 17 de outubro a presidenta da Asociación ARELAS, Cristina Palacios, de familias de menores trans.
O seminario está composto por dúas sesións. Na primeira dela tocáronse catro eixos principais: as catro dimensións da identidade sexual (definición de conceptos e proceso de sexuación), a realidade das e dos menores trans (principais formas de transfobia), criterios de diagnose da transexualidade recollidos no DSMV (Manual Estatístico dos Trastornos Mentais) e a unidade de referencia de atención a menores trans en Galicia (propostas de ARELAS no ámbito sanitario).
Na sesión que terá lugar o vindeiro martes proxectarase o documental "O sexo sentido" e pecharase con acordos e propostas de futuro na atención dos menores trans.
Este é o primeiro dos dous módulos organizados polo Servizo de Igualdade da Deputación de Pontevedra. O segundo deles terá como protagonista a igualdade de oportunidades para o alumnado da Escola de Igualdade e celebrarase os días 14, 21 e 28 de novembro.