Sfera desembarca en Pontevedra: abrirá tenda en Benito Corbal a principios de 2018
Por Alejandro Espiño
Unha nova cadea de moda aterra en Benito Corbal. El Corte Inglés puxo os seus ollos na 'milla de ouro' pontevedresa para abrir nela unha tenda da marca Sfera, a súa liña de moda para xente nova e complementos.
Sfera ocupará dous baixos en aluguer, situados entre a tenda de roupa interior Women's Secret e o do solarium Icaria, que levan varios anos baleiros. Xa solicitaron licenza de obras no Concello de Pontevedra e os traballos de acondicionamento comezarán en breve.
Segundo confirmaron a PontevedraViva desde El Corte Inglés, a intención dos responsables de Sfera é abrir a súa tenda en Pontevedra en febreiro de 2018.
Por agora, engaden estas mesmas fontes, aínda non concretaron o número de empregados que traballarán en Pontevedra, xa que dependerá da distribución que teña a tenda.
A cadea de moda Sfera ofrece roupa infantil, de muller e de home apostando pola calidade de El Corte Inglés, pero con renovación constante e variedade nas súas coleccións.
Con comercios xa en Vigo, Santiago ou A Coruña, entre outros, Sfera oferta pezas e complementos a prezos accesibles seguindo as últimas tendencias da moda urbana.
Sfera será a segunda marca de El Corte Inglés que se instale en Pontevedra, tras a apertura de Supercor entre as rúas Antón Fraguas e Loureiro Crespo hai xa nove anos.