As andainas de Ponte Caldelas atraen a camiñantes doutros puntos da comarca
Por Redacción
Máis de cincuenta persoas participaron este domingo na camiñada do programa municipal de Ponte Caldelas Patea Tapea. Nesta ocasión os camiñantes iniciaban a marcha na parroquia de Forzáns e ao longo de case 15 quilómetros chegaron ata os concellos da Lama e Fornelos de Montes.
Durante tres horas e media de percorrido, os asistentes puideron comprobar a beleza de lugares como Verducido, Vilán ou a praia fluvial de Ponte Caldelas. A totalidade do percorrido transcorreu por espazos naturais, entre os que se incluíu parcialmente a Ruta dos Arrieiros.
A marcha deste domingo contou cunha importante presenza de visitantes procedentes da comarca de Pontevedra, entre eles atopábanse tanto veciños de Pontevedra como de Poio, Marín e Sanxenxo, que mostraron o seu interese polas zonas que percorreron.
Ao termo da ruta, como se establece no programa, houbo tempo para o tapeo que axudou a repoñer forzas nun establecemento de Forzáns.