O goberno local de Ponte Caldelas, disposto a asumir a construción do comedor escolar da Reigosa
Por Redacción
O goberno local de Ponte Caldelas levará ao pleno deste xoves unha moción para resolver as deficiencias que presenta o colexio de Educación Infantil e Primaria da Reigosa. Propoñerán á Consellería de Educación a sinatura dun convenio que permitiría que o Concello asumise a obra completa do comedor do colexio, que vén demandando a comunidade escolar e tamén o 50% da ampliación do ximnasio.
A proposta inclúe unha declaración expresa de apoio ás protestas da Asociación de Nais e Pais (ANPA) deste centro, que se incrementaron neste curso ao ser eliminada unha profesora de Infantil, agrupando a escolares de distintas idades na mesma aula.
Desde o goberno local lamentan que a Consellería rexeitase, meses atrás, un proxecto presentado polo Concello para ampliar o ximnasio incluíndo o comedor escolar. O alcalde Andrés Díaz culpa ao xefe territorial, César Pérez Ares de adoptar a decisión política de non permitir esa proposta alegando pequenas pegas.
Para esta nova proposta que se presentará no pleno, o Concello só esixe á Consellería de Educación que o comedor se sitúe dentro do propio edificio do colexio e facilitar así o financiamento da obra. En todo caso, Díaz afirma que para asumir esa obra o Concello terá que endebedarse pero considera que son obras "moi necesarias" na súa aposta polo ensino público.
O alcalde arremete contra a Xunta de Galicia sinalando que a Consellería de Educación alegou que non dispoñía de 70.000 euros para ampliar o ximnasio do colexio da Reigosa pero si contaba con esa cantidade para mellorar a cuberta do patio de recreo do colexio de Tenorio.
"Esas son as prioridades desta administración que trata aos escolares segundo a cor política do concello onde residan", afirmou Andrés Díaz lamentando a actitude do goberno de Núñez Feijóo.
Relacionadas:
-
O comedor escolar do colexio da Reigosa, asignatura pendente en Ponte Caldelas
Por Redacción |
-
Ponte Caldelas leva ata o Comisionado de Transparencia a súa denuncia de caciquismo contra a Xunta
Por Redacción |
-
O colexio da Reigosa, a punto para acoller os escolares no arranque do curso
Por Redacción |
-
O Concello de Ponte Caldelas asina dous convenios en beneficio do colexio da Reigosa
Por Redacción |
-
Ampliar o ximnasio e construír un comedor, demandas do Concello para o colexio da Reigosa
Por Redacción |