A praza do Hospital convértese nun mercado de produtos locais e ecolóxicos
Por Redacción
Bollas de pan, legumes de horta, plantas e diferentes produtos naturais convertéronse este sábado en centro de atención na praza do Hospital Provincial, na rúa Loureiro Crespo. Trátase da primeira vez que este escenario acolle o mercado 4 Ponlas de produtores locais e ecolóxicos.
Os organizadores estudan a posibilidade de celebrar esta cita o segundo e cuarto sábado de cada mes, do mesmo xeito que viñeron ofrecendo esta alternativa ecolóxica o primeiro, terceiro e quinto sábado de cada mes ante o Mercado de Abastos, desde hai dous anos.
Con esta proposta queren que a cidadanía converta en cotiá a compra deste tipo de produtos. O encontro permite aos veciños coñecer como se elaboran estes produtos e mesmo degustalos.