As oficinas camerais de Pontevedra e Vilagarcía xa tramitan as altas de autónomos e de sociedades
Por Redacción
As oficinas camerais de Pontevedra e Vilagarcía de Arousa acaban de empezar a tramitar a alta/baixa dos traballadores autónomos e a constitución de Sociedade Limitada Nova Empresa (SLNE) ou Sociedade Limitada (SL).
As dúas localidades súmanse á actividade que vén desenvolvéndose en Vigo e convértense en Punto PAE (Punto de Atención ao Emprendedor), é dicir, encárganse de facilitar a creación de novas empresas, o inicio efectivo da súa actividade e o seu desenvolvemento, a través da prestación de servizos de información, tramitación de documentación, asesoramento, formación e apoio ao financiamento empresarial.
Con este novo paso preténdese facilitar aos emprendedores a posta en marcha dos seus novos negocios.
Ata agora, as persoas que querían iniciar a súa actividade como traballadores autónomos (ou causar baixa) tiñan que solicitar a súa admisión en Facenda e na Seguridade Social.
O prazo aproximado para a constitución das empresas, con este sistema, é de tres días
Con esta posta en funcionamento, o emprendedor tan só terá que acudir ao departamento de Creación de Empresas da Cámara de Comercio, o que supón un importante aforro de tempo e de desprazamentos, dado que se trata dun proceso telemático e unificado (a xestión realízase no mesmo día).
Con respecto ao trámite administrativo de constitución da Sociedade Limitada Nova Empresa (SLNE) e Sociedade de Responsabilidade Limitada (SL), a Cámara realiza o trámite ao completo, desde a solicitude de código ID-CIRCE, a reserva da cita notarial e o enchemento do DUE, ata a obtención do CIF da nova empresa. O prazo aproximado para a constitución das empresas, con este sistema, é de tres días.