Pontevedra renova a tradición da ofrenda floral á Virxe Peregrina
Por Redacción & Cristina Saiz
Xunto co pregón, Pontevedra viviu este sábado outra das tradicións coa que arrancan todos os anos as Festas da Peregrina: a ofrenda floral á virxe que dá nome ao santuario relixioso máis representativo da cidade.
Numerosos pontevedreses participaron nesta ofrenda que comezou co traslado da carroza procesional da virxe desde a praza de España ata a praza da Peregrina, atravesando toda a rúa Michelena.
Xa no santuario, centos de fieis subiron ata o atrio para depositar os seus ramos de flores na honra á patroa da provincia, a Virxe Peregrina.
Durante a ofrenda tomou a palabra a alcaldesa de Marín, María Ramallo, que destacou o "exemplo e a humildade" da patroa pontevedresa, á que pediu que siga sendo a "mellor guía e causa" para todos, incluídos os turistas que visitan as Rías Baixas.
Ademais, un pasacalles protagonizado polas agrupacións folclóricas Os Alegres, Os de Algures, Grupo Polavila, Gaiteiros das Rías Baixas, Duos Pontes e Celme, acompañados por xigantes, cabezudos e charangas, amenizou a espera antes da ofrenda.
Todos estes grupos, ao remate do oficio relixioso, protagonizaron diferentes actuacións.
A vertente relixiosa das Festas da Peregrina terá continuidade este domingo coa misa que se celebrará no santuario ás doce da mañá e, posteriormente, coa tradicional procesión que partirá da praza da Peregrina ás nove da noite.
Relacionadas:
-
A devoción pola Virxe Peregrina inunda as rúas de Pontevedra
Por Alejandro Espiño & Diego Torrado |
-
Un gran espectáculo pirotécnico pon o broche de ouro ao primeiro día de festas
Por Redacción & Diego Torrado |
-
A Feira do Mel abre as súas portas fronte o mercado de abastos
Por Alejandro Espiño & Cristina Saiz |
-
Pontevedra xa está en festas!
Por Alejandro Espiño & Cristina Saiz |
-
A tradicional ofrenda á Virxe Peregrina marca o comezo da tempada granate
Por Ramiro Espiño |