O PP solicita un pleno extraordinario para "fixar a postura" da Deputación sobre Príncipe Felipe
Por Oskar Viéitez & Mónica Patxot
O grupo provincial do Partido Popular solicitou este mércores por rexistro a celebración dun pleno extraordinario para "fixar a postura" da Deputación de Pontevedra sobre a Cidade Infantil Príncipe Felipe, despois de que o goberno provincial anunciase unilateralmente a supresión do convenio de colaboración coa Xunta por mor dos incidentes que xeran os menores conflitivos que desvía a Consellería de Política Social en réxime de internamento.
Nunha comparecencia de prensa ante o Pazo Provincial a portavoz do PP, Nidia Arévalo, explicou que demandarán a ratificación do convenio existente entre a administración provincial e a Consellería de Política Social respecto deste centro.
Ademais piden unha declaración de apoio ao mantemento da totalidade dos servizos prestados na cidade infantil, especialmente, na Unidade de Primeira Acollida e no réxime de internamento.
Os populares tamén queren que se revoguen as delegacións da presidenta, Carmela Silva, noutros deputados "no sentido de unificar a xestión". Segundo Nidia Arévalo "non pode ser que unha parte do Príncipe Felipe dependa dunha deputada do BNG e outra dunha deputada do Partido Socialista" xa que, ao seu xuízo a existencia dun conflito neste centro, "é unha das consecuencias destes pactos que soamente serven é para botar ao Partido Popular fóra dos gobernos e en realidade despois non hai entendemento, non hai diálogo e non hai comunicación".
Finalmente o PP provincial reclamará a convocatoria da comisión mixta de seguimento prevista no convenio para a atención de menores na cidade residencial Príncipe Felipe.
O viceportavoz do PP na Deputación, Ángel Moldes, engadiu que o goberno provincial "está a buscar o peche" deste centro pero "agora déronse conta de que actuaron mal e están a improvisar".
Relacionadas:
-
A Xunta e a Deputación manterán unha xuntanza este xoves para tratar o conflito do Príncipe Felipe
Por Anxo Lourido |
-
A Deputación reitera a súa vontade de "erradicar" a violencia no Príncipe Felipe fronte á "campaña orquestrada polo PP"
Por Oskar Viéitez |
-
José Ramón Piñeiro: "Non debería haber moitos problemas para chegar a un acordo" en Príncipe Felipe
Por Oskar Viéitez |
-
Presentan catro propostas para "erradicar de raíz" a violencia e o deterioro de Príncipe Felipe
Por Redacción |
-
A Xunta tende a man á Deputación para falar dos menores do Príncipe Felipe
Por Oskar Viéitez |
-
A Deputación potenciará Príncipe Felipe: "Non hai ningunha discusión sobre o seu futuro"
Por Oskar Viéitez |