Comeza a aventura na Lanzada!
Por Redacción
A aventura comezou para a primeira quenda de nenos e mozos da provincia que este ano participará nos campamentos de verán da Deputación de Pontevedra 'Depo Aventura A Lanzada'. Ao longo de todo o verán -ata o 9 de setembro- pasarán polas instalacións do Grove 2.200 menores pontevedreses.
A quenda inaugural chegou este domingo e permanecerá na Lanzada ata o vindeiro sábado 1 de xullo. Deulles a benvida a eles e ás súas familias a deputada de Cohesión Social e Xuventude, Digna Rivas, que destacou o carácter inclusivo desta iniciativa, á que a institución provincial destina 240.000 euros.
A Deputación lembra que o obxectivo deste programa, que este ano por primeira vez inclúe actividades de inmersión lingüística en inglés, é que os 2.200 menores que pasen pola Lanzada empreguen o seu tempo libre no verán participando en actividades de carácter lúdico, cultural, artístico, medioambiental, deportivo e formativo que contribúan ao seu enriquecemento persoal e lles faciliten coñecer outros lugares fóra da súa contorna habitual.
Na edición deste ano 2017 un total de 300 prazas están reservadas para menores en situación ou risco de exclusión social e estarán subvencionadas ao 100% pola Deputación. Ademais, participarán ao longo de todo o verán 45 rapaces con diversidade funcional, seis na quenda que comezou este domingo.