Preto de 200 rapaces participarán en Pontevedra nun congreso de educación ambiental sobre compostaxe
Por Redacción
Preto de 200 escolares de colexios de toda a provincia estarán este martes no Pazo da Cultura para participar no I Congreso de Educación Ambiental sobre Compostaxe para centros de ensino de Pontevedra organizado pola Deputación ao abeiro do Plan Revitaliza.
Os rapaces presentarán os proxectos sobre compostaxe que levan a realizar durante todo o curso nos seus centros de ensino da man dos seus profesores e en colaboración co Centro de Extensión Universitaria e Divulgación Ambiental de Galicia (CEIDA).
O programa da xornada comezará ás 10.00 da mañá coa inauguración oficial a cargo do presidente en funcións César Mosquera; do director do CEIDA, Carlos Vales, e do alcalde de Pontevedra, Miguel Anxo Fernández Lores. Despois chegará a quenda da presentación dos proxectos.
Entre as 10.30 e as 12 serán os nenos do CEIP Plurilingüe San Benito de Lérez, baixo o título ‘Do composteiro á horta’; logo seguirá ‘Compostando coas mans na terra’, do CEIP Valle Inclán (O Grove); ‘Cooperativa Riomaior’, do CEIP Plurinlingüe de Riomaior de Santa Cristina de Cobres (Vilaboa) e finalmente ‘Compostarte’, da EEI Verducido (Pontevedra).
Chegará entón o momento para unha peza de teatro, a cargo da compañía teatral Mofa e Befa, que representarán ‘Cociña Ecónomica’.
Finalmente, seguirase coa presentación dos proxectos ‘Noalla Compostando’ do CEIP Noalla-Telleiro (Sanxenxo) e ‘A nosa vida no Toural: Ecolóxica, saudable e natural’, do CPI do Toural (Vilaboa).
A xornada rematará cunha visita á Illa das Esculturas, para coñecer a súa diversidade de fauna e flora, e cos obradoiros didácticos da exposición ‘Imaxinar a Educación. 50 anos con Frato’ baseada no ideario do pedagogo Francesco Tonucci.
Relacionadas:
-
O PP pide á Deputación un informe detallado do plan de compostaxe
Por Oskar Viéitez |
-
A compostaxe tamén é cousa de nenos
Por Oskar Viéitez |
-
Expertos internacionais de renome imparten leccións maxistrais na Facultade de Compostaxe
Por Oskar Viéitez & Mónica Patxot |
-
De visita escolar a… un composteiro
Por Redacción |
-
De maior quero ser… mestre composteiro!
Por Redacción |
-
Os rapaces na escola andan a voltas coa compostaxe
Por Redacción |
-
Os escolares de Verducido, Noalla e As Bizocas achéganse á compostaxe
Por Redacción |
-
'Quen vive aí?' 300 escolares de Vilaboa coñecen como facer compost
Por Redacción |