O Concello comezará o luns a limpeza do vertedoiro de Cons
Por Redacción
A primeira hora da mañá deste luns iniciará o Concello a limpeza do vertedoiro de Cons, na parroquia de Mourente, a cargo da empresa Ediserpo que fará a retirada, transporte e tratamento dos residuos acumulados por 47.808,78 euros.
A parcela ten unha superficie de 14.191 metros cadrados na que se atopan depositados unha grande cantidade de desperdicios domiciliarios como restos orgánicos, papel, cartón, envases, plásticos, vidro, colchóns, mobles, electrodomésticos, aparatos eléctricos e electrónicos, textís, restos de demolicións e de pequenas obras, neumáticos, cubertas de fibrocemento...
Todos están totalmente abandonados, fóra de uso e nun avanzado estado de descomposición.
Na limpeza será necesaria unha separación previa dos distintos tipos de residuos, con especial atención aos neumáticos e ao amianto por tratarse de restos perigosos e suxeitos a un protocolo específico de manipulación e tratamento.
Os traballos consistirán na carga e transporte dos residuos; tratamento dos non perigosos mezclados; recollida, transporte e tratamento de neumáticos e de amianto; e limpeza final da zona.