O recorte a Correos supoñería a perda de 220 empregos na provincia, segundo CCOO
Por Oskar Viéitez
CCOO, sindicato maioritario de Correos en todo o Estado, chamará ao resto de organizacións sindicais e aos traballadores do operador postal público na provincia de Pontevedra, a mobilizarse se non se corrixen nos orzamentos xerais do Estado para 2017, o "tijeretazo" previsto de 60 millóns de euros para o financiamento do servizo postal público.
Este recorte, segundo o sindicato, "podería levar á quebra a Correos, eliminar un terzo do seu persoal, e a desaparición do servizo postal nun gran número de municipios".
Na provincia de Pontevedra supoñería a perda de 220 empregos, segundo sinalou o portavoz de Comisións Obreiras, Eusebio Cousillas.
Isto provocará o peche de centos de oficinas como as de Cerdedo, Moraña, Vilaxoán en Vilagarcía, Vilalonga en Sanxenxo, Meaño, Barrantes en Ribadumia, Meis, Carballedo en Cercedo-Cotobade, Barro, Campo Lameiro, A Lama, Seixo en Marín, Vilaboa ou Poio.
Ademais afectaría os servizos de repartición na área rural, engade Cousillas.
Comisións Obreiras asegura que detrás deste recorte hai "un ataque directo ao público por parte dos lobbies privados que están a tratar de morder, de acabar co servizo postal público como fixeron con tantas empresas".
Relacionadas:
-
Ameazan con folga en Correos ante o temor de peche de oficinas rurais na provincia
Por Mónica Patxot & Anxo Lourido |
-
Folga indefinida do persoal de Unipost da man do sindicato CXT
Por Redacción |
-
Correos sopesa utilizar para oficinas privadas a primeira planta da súa sede da Oliva
Por Oskar Viéitez |