Moldes pide á Xunta que rexeite a oferta de Poio de pagar as expropiacións na PO-308
Por Oskar Viéitez
O voceiro do PP de Poio, Ángel Moldes, pediu á Xunta que non faga caso á "ocorrencia" da alcaldesa en funcións, Chelo Besada, que se ofreceu a pagar as expropiacións dos terreos da PO-308 para que a Consellería poida acometer a mellora da seguridade neste vial.
"É unha manobra de distracción para retrasar a obra o máximo posible e os únicos prexudicados serían os veciños", criticou o voceiro popular.
Moldes reuniuse este martes co delegado territorial da Xunta, José Manuel Cores Tourís, a quen lle dixo que "despois das súas mentiras, non se lle pode dar credibilidade ao bipartito, e máis cando veñen da man de alguén como Andrés Díaz, un modelo de confrontación e de política con minúsculas, que se preocupa máis de intrigas e leas de partidos que de levar adiante proxectos para os veciños".
Ademais, para Moldes, o apoio do alcalde de Ponte Caldelas a Besada ten máis que ver "coas loitas internas do PSOE que co seu interese pola estrada", e apuntou que "probablemente a foto molestoulle máis á presidenta da Deputación que ao PP de Poio".
O voceiro popular transmitiulle ao delegado da Xunta que "a única esperanza dos veciños de Poio para que as beirarrúas da PO-308 sexan unha realidade é que a administración autonómica faga o que o concello non quere ou non sabe facer: traballar, negociar cos veciños e, no seu caso, expropiar".
Moldes confirmou co delegado territorial que o goberno local de Poio, BNG-PSdeG, non puxo a disposición da Xunta "nin un só metro dos que comprometera" para esta marxe peonil, o que para o voceiro popular demostra que "a Xunta non pode fiarse das palabras ou das promesas do goberno de Sobral".
COTOBADE OU A LAMA COMO EXEMPLOS
Para Ángel Moldes a proba de que a Xunta esixe a todos os gobernos locais as mesmas condicións son, por exemplo, os concellos da Lama ou Cerdedo-Cotobade, nos que os seus alcaldes tiveron que negociar os terreos e poñelos a disposición para que a Xunta acometese as obras na estrada autonómica.
Nesta liña, o voceiro lamentou que Poio non aposte por este modelo. "A única diferencia entre estes concellos é que mentres Poio e Ponte Caldelas andan con algaradas e teatros, outros gobernos, como os de Cerdedo-Cotobade e A Lama traballan con seriedade, reúnense cos veciños, xestionan e toman decisións".
Relacionadas:
-
Ángel Moldes cre que o bipartito de Poio "ten que pedir perdón a moita xente" en relación coa PO-308
Por Redacción |
-
A Xunta acepta a proposta de Poio e expropiará os terreos para construír a senda peonil e ciclista na PO-308
Por Oskar Viéitez |
-
O goberno local denuncia o boicot da Xunta a Poio
Por Oskar Viéitez |
-
Poio ofrécese á Xunta a pagar as expropiacións que permitan mellorar a seguridade viaria en Raxó e Covelo
Por Diego Espiño |
-
O PP tilda de "falsas, desafortunadas e fóra de lugar" as críticas de Chelo Besada sobre a PO-308
Por Redacción |
-
"A Xunta ten unha débeda histórica con Poio e os seus intereses, desgraciadamente, páganse con mortos"
Por Oskar Viéitez |