O Camiño de Santiago estará máis vixiado durante a Semana Santa
Por Oskar Viéitez
O delegado do Goberno en Galicia, Santiago Villanueva, presentou este luns o dispositivo especial destinado a reforzar a seguridade no Camiño de Santiago durante a Semana Santa.
O despregamento está composto por motoristas da agrupación da Garda Civil de Tráfico e do SEPRONA, así como por cinco cabalos do Escuadrón de Cabalería e axentes da Garda Civil de Seguridade Cidadá.
Refórzase a presenza das forzas e corpos de seguridade do Estado ao longo das rutas, especialmente nos puntos máis vulnerables para a seguridade como son os cruces con rúas e estradas importantes, albergues e lugares de acollida e concentración de peregrinos. Igualmente, establecéronse servizos para previr e investigar a loita contra a delincuencia nos distintos itinerarios e instalacións do Camiño.
Unha vez pasada a Semana Santa este despregamento volverá repetirse desde o 15 de xuño e ata o 15 de setembro.
A Axencia Galega de Turismo colabora dotando de material reflector de seguridade aos peregrinos e de realizar campañas de concienciación entre estes para o emprego da comunicación telemática que informe como están a realizar o Camiño e onde se atopan en cada etapa.