Restricións circulatorias o domingo en Joaquín Costa por obras para o Hospital Provincial
Por Redacción
Este domingo día 26 de marzo a rúa Joaquín Costa permanecerá pechada ao tráfico por mor dunhas obras urxentes que son necesarias para dotar de servizos ao Hospital Provincial de Pontevedra.
Segundo informou a Policía Local de Pontevedra, o tramo afectado é o comprendido entre as rúas Cobian Areal e Antón Fraguas e está previsto que a rúa estea pechada entre as 8.00 horas e as 22.00 horas, aínda que non se descarta que quede reaberta antes, pois os traballos poden rematar en menos tempo.
A Policía Local de Pontevedra deseñou un operativo especial de tráfico na zona para reducir os inconvenientes que poida ocasionar o corte a condutores e veciños. Garante o acceso e saída dos garaxes da zona afectada.