As choivas provocan filtracións nas áreas de Farmacia e Esterilización do Hospital do Salnés
Por Redacción
As choivas das primeiras horas deste venres afectaron ao Hospital do Salnés, provocando filtracións de auga en varias zonas, en especial nas áreas de Farmacia e Esterilización. Non se produciron danos persoais e a actividade asistencial non se veu interrompida no centro hospitalario.
As filtracións coincidiron coa construción da segunda placa na cuberta na zona de obras da terceira fase de ampliación do hospital e desde o centro aseguran que non afectaron á actividade dos dous servizos -Farmacia e Esterilización-, senón que se mantiveron "dentro da normalidade asistencial".
Como medida de seguridade e para garantir a actividade, trasladouse a esterilización do instrumental, que ao longo dos vindeiros días se levará a cabo provisionalmente no servizo de Esterilización do Hospital Montecelo. Así mesmo, optouse por reforzar a limpeza e se realizará un seguimento pormenorizado da evolución da situación nas próximas horas.
Fontes da área sanitaria de Pontevedra e o Salnés aseguran que ao longo da mañá xa se tomaron as medidas e accións correctoras pertinentes para solucionar as incidencias rexistradas.
A dirección púxose en contacto coa empresa adxudicataria das obras, que reforzou o persoal e a vixilancia. A zona permanece sometida a seguimento e supervisión técnica e colocaranse lonas protectoras, posto que a previsión meteorolóxica de cara á fin de semana é que persistan as choivas.