Dolores Godoy celebra un século de vida rodeada de familiares ataviados como nos "tolos anos 20"
Por Redacción
Vestidos de charleston, chapeus de palla, traxes de tweed... os familiares de Dolores Godoy Martínez sorprenderon así vestidos a esta muller que este sábado 25 celebraba 100 anos de idade. E facíao cunha comida nun lugar tan emblemático como o Café Moderno.
Ata alí acudiu o alcalde de Pontevedra, Miguel Anxo Fernández Lores, para agasallala cun ramo de flores e quedou en volver o próximo ano para seguir compartindo esta celebración coa centenaria natural de Tenorio (Cotobade), que leva vivindo en Pontevedra desde que faleceu o seu marido.
Os seus tres fillos foron os encargados de organizar este orixinal evento aproveitando as festas de Entroido e recuperando a estética dos tolos anos 20, a época na que naceu Dolores, que salvo os seus problemas de audición, conta cunha saúde envexable.
O segredo desta muller seguramente se atope en que é moi activa e recoñece que aínda segue cociñando, sobre todo, legumes. Ela asegura, entre sorrisos, que "muller enferma, muller eterna" chanceando sobre as cinco operacións que suma no seu historial médico.
O bo humor rodeou a celebración durante esta divertida festa en que Dolores se mostrou moi orgullosa da súa familia.