Carmela Silva recibirá a Alfonso Rueda "con toda a cordialidade, con todo o respecto institucional"
Por Oskar Viéitez
O vindeiro luns 27 de febreiro o presidente da Xunta, Alberto Núñez Feijóo, recibirá en Santiago de Compostela á presidenta da Deputación de Pontevedra, Carmela Silva.
A cita compostelá estará precedida polo encontro que manterán este luns 13 no Pazo Provincial, Carmela Silva e o vicepresidente da Deputación, César Mosquera, co vicepresidente da Xunta, Alfonso Rueda e a conselleira de Medio Ambiente, Beatriz Mato.
Neste encontro a Xunta explicará a súa proposta para rehabilitar o emblemático Pazo de Lourizán co financiamento de Ence que convertería o inmoble no seu centro de investigación e desenvolvemento en materia forestal sen que se perda a titularidade pública do edificio.
Este venres en rolda de prensa Carmela Silva indicou que acudirá á entrevista para escoitar a proposta de Alfonso Rueda e Beatriz Mato "desde a lealdade, valorando cales son as posibilidades e cal é o proxecto de futuro" e engadiu que "vou escoitar desde unha posición positiva, como debe ser entre administracións".
"O primeiro é respectar que o vicepresidente da Xunta vén aquí" polo que "vai ser recibido con toda a cordialidade, con todo o respecto institucional", subliñou Carmela Silva.
A presidenta lembrou que desde o ano 1943 o Pazo de Lourizán estivo xestionado "ao cento por cento", primeiro polo Estado e despois pola Xunta en "convenios sucesivos" coa Deputación que é a propietaria do inmoble.
"Con tranquilidade, con serenidade e con rigor", Carmela Silva lembrará este dato xunto a outros detalles do convenio en vigor coa Xunta polo que a Deputación ten cedido o uso desta histórica residencia de Montero Ríos.
Relacionadas:
-
Príncipe Felipe e o Pazo de Lourizán, entre as "posibles" transferencias entre Deputación e Xunta
Por Alejandro Espiño |
-
A Deputación apoia un centro de investigación da Xunta no Pazo de Lourizán pero "de Ence, non"
Por Oskar Viéitez & Mónica Patxot |
-
Estes son os plans de ENCE para o Pazo de Lourizán
Por Oskar Viéitez |
-
Os socialistas queren saber a posición do Concello de Pontevedra sobre os usos do Pazo de Lourizán
Por Oskar Viéitez |
-
Xunta e Deputación cítanse na véspera do Día dos Namorados
Por Oskar Viéitez |
-
A APDR pide á Deputación que garanta a titularidade pública do Pazo de Lourizán
Por Oskar Viéitez |