As lonxas pontevedresas facturaron 14 millóns de euros o ano pasado
Por Redacción
As lonxas de Bueu, Campelo (Poio), Marín e Portonovo (Sanxenxo) e o mercado de Pontevedra facturaron ao longo do ano 2016 un total de 13,9 millóns de euros a través da venda de 5,3 toneladas de peixe e marisco.
Así figura nas estatísticas oficiais de venda en lonxas de Pesca de Galicia, a plataforma tecnolóxica da pesca na comunidade, na que se recolle que todas as lonxas galegas venderon 50,5 toneladas de marisco e pescado o último ano, xerando un volume de negocio de 180,8 millóns de euros.
Na provincia de Pontevedra o ránking das vendas encabézao a lonxa de Vigo, con 38 toneladas vendidas por 116 millóns, e séguenlle as de comarca de Arousa, pero Pontevedra tampouco ten nada que envexar as súas cifras, sendo a mellor situada a lonxa de Bueu, na que se poxaron 883.900 toneladas de produto por un importe de 4,5 millóns de euros.
Portonovo é a seguinte lonxa en actividade económica, ao alcanzar nos últimos doce meses os 2,2 millóns de euros de facturación e poxar 2,5 toneladas de produtos do mar.
Por volume económico, a lonxa de Campelo, en Poio, é a terceira da zona de Pontevedra con maior negocio xerado, 3,8 millóns de euros, pero se se atende á cantidade de marisco e peixe vendida, é a de Marín a que ocupa a cuarta praza, ao vender 1,4 toneladas de produto, pero por 3,1 millóns, sete menos que a de Poio. A mercadoría poxada en Campelo situouse nun peso de 431.247 quilos.
O mercado de Pontevedra, con 16.579 quilos e 244.833 euros facturados, pecha o listado.