A seguridade viaria, unha das principais preocupacións en Ribadumia e Moraña
Por Redacción
José Manuel Cores Tourís, recentemente renovado no seu cargo como delegado territorial da Xunta de Galicia, visitaba este martes os concellos de Ribadumia e Moraña para entrevistarse cos seus alcaldes, David Castro e Luisa Piñeiro.
Ambos os rexedores trasladaron ao representante da Xunta as principais demandas dos veciños do municipio. David Castro reclamou o avance na concentración parcelaria de Ribadumia, en concreto, na de Lois-Monte de Ribadumia, onde nestes momentos está a finalizar a creación das pistas rurais e a colocación dos marcos.
Castro tamén demandou axudas para potenciar o polígono industrial do Salnés, ademais de melloras no aforro enerxético e na mellora da seguridade viaria, sobre todo nas inmediacións do centro educativo de Barrantes.
A seguridade viaria tamén foi unha das peticións que realizou a alcaldesa de Moraña, Luisa Piñeiro, durante a visita do delegado. Solicitou a mellora de infraestruturas viarias e de diferentes servizos. Pediu a axilización da contratación das obras do plan Hurbe, que permitirán a reforma do tellado do antigo mercado da vila, que será reformado como edificio de usos múltiples. A consellería de Medio Ambiente investirá 230.000 euros nesta primeira fase pero, segundo a alcaldesa, o obxectivo é continuar acondicionando o interior do edificio e cambiar todas as carpinterías.
Piñeiro tamén demandou a continuación da senda que se executou no polígono de Moraña e que permitirá completar a seguridade viaria entre O Souto e O Silvoso.
Relacionadas:
-
Moraña recibirá medio millón de euros da Deputación
Por Redacción |
-
Portas pide axilidade nas concentracións parcelarias de Briallos e Romai
Por Redacción |
-
Poio e Meis, na axenda de Cores Tourís
Por Redacción |
-
Cores Tourís pregunta a Carmela Silva se vai tomar "represalias" cos alcaldes da "lista negra"
Por Oskar Viéitez |