150 familias pontevedresas participan xa no programa Apego
Por Alejandro Espiño
En Pontevedra hai xa 150 familias inscritas dentro do programa Apego, un proxecto que busca acompañar aos pais na transmisión da nosa lingua e recuperar o galego como lingua de relación familiar. Así o recordou o concelleiro de Normalización Lingüística, Alberto Oubiña.
O Concello pon en marcha unha nova quenda de actividades dentro do programa Apego, que se desenvolverán durante os meses de outubro e novembro. Son actividades dirixidas a familias con nenos e nenas de 0 a 6 anos ou que están en agarda. Terán prioridade aquelas que xa estean inscritas nesta actividade, aínda que poden participar outras que non o estean.
As actividades achegaranlles aos adultos recursos como cantos de arrolo, recitados, xogos de dedos ou contos rimados para que despois poidan poñelos en práctica na casa, e así "arrequecer a lingua coa que se comunican, xogan e lles aprenden aos máis pequenos", sinalou o edil del BNG.
Estas actividades son:
Prende no Colo, obradoiro con Luís Prego e Samuel Soto. As familias participantes aprenderán cantigas, cantos de berce, xogos de dedos, recitados e outras pezas cheas de ritmo e melodía a partir de temas tradicionais galegos. Está dirixido a familias con fillos e fillas de 0 a 3 anos e haberá dúas sesións independentes, cada unha de 50 minutos, que se desenvolverán o sábado 22 de outubro, de 12 a 13 horas e o xoves 24 de novembro, de 18 a 19 horas.
Percorre a cidade e atopa a lingua, ruta urbana con Roberto Rivas. Esta actividade é unha oportunidade para descubrir en familia a lingua que atesoura Pontevedra, con explicacións e xogos polas rúas e prazas. Está dirixida a familias con fillos e fillas de 0 a 6 anos. Será o xoves 27 de outubro, de 17 a 18.30 horas, con saída desde a praza da Peregrina. Nesta ruta urbana poderán participar familias doutros concellos inscritas no programa Apego.
Orella Pendella, obradoiro con Bea Campos e Davide González, de Migallas Teatro. Dúas sesións de narración oral para que as familias con fillos e fillas de 0 a 6 anos aprendan e xoguen cos ditos infantís de sempre e con cancións tradicionais, con música en directo. As dúas sesións serán independentes, cada unha de 45 minutos, o sábado 5 de novembro, ás 11.30 e ás 12.30 horas.
Contos para bebés, obradoiro con Pavís Pavós sobre contos, cantos e arrolos para familias con bebés de 0 a 3 anos. As nais e os pais escoitarán e aprenderán pequenas historias apropiadas para as primeiras idades, historias que falan das cousas cotiás enlazadas con ditos e cancións tradicionais e algunha composta adrede para esta función. Haberá unha única sesión de 40 minutos de duración, o xoves 10 de novembro, ás 17 horas.
Axúdame a expresarme! Obradoiro sobre materiais e actividades Montessori para o desenvolvemento da expresión oral; con Sara Pena, de Rachachán. Neste obradoiro realizarase unha aproximación ao desenvolvemento da linguaxe nos primeiros anos de vida. Desenvolverase nunha única sesión o xoves 17 de novembro, de 18.30 a 19.30 horas.
Os obradoiros e a charla realizaranse na Casa da Luz e a ruta guiada sairá da praza da Peregrina.
Ademais das 150 familias de Pontevedra, o servizo de Normalización Lingüística asegura que está a recibir chamadas de familias residentes noutros concellos como Marín, Sanxenxo, Poio ou Ponte Caldelas interesándose por este programa. Se lles remite a información, pero non se lles pode atender ao pertencer a un municipio diferente.
Relacionadas:
-
Volven os obradoiros de Apego para fomentar a transmisión familiar da língua galega
Por Redacción |
-
Achegamento á metodoloxía Montessori da man do programa Apego
Por Redacción |
-
Na Casa da Luz o galego 'prende no colo'
Por Redacción |
-
Aprender a resolver situacións coas crianzas buscando a felicidade
Por Mónica Patxot |
-
A música galega tamén se goza desde o colo
Por Diego Torrado |
-
Apego amplíase a 23 municipios e a máis dun millón de habitantes
Por Redacción |