Miles de persoas réndense aos Milagres de Amil
Por Diego Torrado
Despois dunha longa noite na que os peregrinos chegaron ao santuario dos Milagres de Amil desde todos os puntos da provincia, este domingo a famosa romaría de Moraña viviu a súa xornada grande. Desde as seis da mañá repetíronse misas rezadas cada hora, ás 11.00 horas foi a quenda da habitual misa en galego e ás 13.00 horas oficiouse a misa solemne e chegou o momento central do día: a procesión polo campo do santuario.
A Virxe saíu en procesión co seu manto sementado de billetes, como é habitual, e miles de devotos mostráronlle todos os seus respectos baixo un sol de xustiza. Xa pola tarde, as misas estaban programadas ás 17.00 e 18.00 horas, ás 19.00 horas terá lugar a misa de despedida dos romeus e ás 20.00 horas a última misa do día.
Os actos litúrxicos continuarán o vindeiro sábado 17 de setembro ás 10.00 e 12.00 horas, e pola tarde con misas ás 17.00, 18.00, 19.00 e 20.00 horas. Xa o domingo 18, será o día grande en honra á nosa Señora de Guadalupe, con misas desde as 8.00 da mañá e a misa solemne con procesión ás 13.00 horas. Pola tarde será a quenda das tradicionais poxas das ofrendas en especie ás 17.00 horas e haberá misas ás 18.00, 19.00 e 20.00 horas.