Interveñen 428 pezas de roupa supostamente falsificada no mercado do Grove
Por Redacción
A patrulla fiscal da Garda Civil de Vilagarcía de Arousa incautou na mañá deste venres un total de 428 pezas de roupa supostamente falsificada no mercado ambulante que se celebra cada venres na praza do Corgo do Grove, feito delituoso polo que hai dúas persoas investigadas.
A maior parte das pezas incautadas eran polos, pezas deportivas e gorras e tiñan etiquetas comerciais de distintas marcas rexistradas. En total, alcanzarían un valor no mercado que podería superar os 20.000 euros. Tras a súa incautación, xa foron postas a disposición xudicial.
A intervención foi resultado das actividades que desenvolve a Garda Cvil de Pontevedra para erradicar a venda e distribución de roupa falsificada nos distintos mercadillos da provincia. Este venres inspeccionaron aleatoriamente a mercadoría que transportaban os vehículos que se dirixían ao mercado ambulante do Grove e en dous deles atoparon partidas de roupa supostamente falsificada, 216 nun e 212 noutro.
Os propietarios dos dous coches eran de orixe senegalesa, pero co domicilio fixado en Pontevedra. A preguntas dos axentes da patrulla fiscal, ningún deles puido acreditar a procedencia da roupa nin achegar autorización das marcas rexistradas para a súa venda, por cuxo motivo se lles citou en calidade de investigados como supostos autores dun delito contra a propiedade industrial.