Detido por estafa o vidente que se anunciaba como 'Maestro Sisse'
Por Natalia Puga
K.C., de 39 anos e nacionalidade senegalesa, pero veciño de Pontevedra, é a persoa que está supostamente detrás dos anuncios que periodicamente aparecían publicados en medios de comunicación ou colocados nos parabrisas dos coches ou que se entregaban en persoa na rúa co reclamo 'Maestro Sisse. Vidente Curandero'. Ofrecía "arreglar casos desesperados" en materias como o amor, o mal de ollo ou a mala sorte nos negocios e durante anos conseguiu facerse cunha infinidade de clientes atraídos pola súa promesa de resultados inmediatos. Agora a Garda Civil detívoo como suposto autor dun delito de estafa tras recibir as denuncias de dúas presuntas vítimas de Meaño e A Estrada.
Segundo informou a Garda Civil, a investigación empezárona efectivos do posto de Cambados no mes de abril tras unha denuncia dunha veciña de Meaño que aseguraba que fora obxecto dunha estafa de máis de 7.000 euros por parte dun vidente.
En marzo contratara os seus servizos para resolver uns problemas familiares co pago dunha cota inicial xa concertada de 400 euros, pero, unha vez contratado o traballo, recibiu dúas chamadas telefónicas do vidente para pedirlle en depósito un total de 7.318 euros que necesitaba para completar o ritual e "apostar aos espíritos", 5.402 euros na primeira chamada e 1.926 a segunda, sempre co compromiso de devolverlle ese diñeiro acabado o traballo.
Terminado o traballo, reclamoulle o diñeiro, non llo devolveu, de modo que esta veciña sentíuse estafada e acudiu a Garda Civil, que iniciou unha investigación. Iniciadas as indagacións, tívose coñecemento de que outra veciña da Estrada denunciara ese mesmo mes unha estafa co mesmo modus operando. No seu caso, concertou que o servizo contratado custaba 600 euros, dos que abonou 300, pero logo o vidente pediulle por teléfono outros 1.725 euros en depósito tamén co compromiso de devolverllos dous días máis tarde.
No caso desta veciña da Estrada, tamén houbo un episodio violento cando se presentou na consulta do vidente para indicarlle que prescindía dos seus servizos e reclamarlle a devolución dos 1.725 euros. Si accedía a pagar os 300 euros que lle quedaban pendentes de pago da primeira cita, pero a reacción do vidente foi responderlle con palabras violentas, de modo que a clienta acudiu á Garda Civil.
Froito das investigacións realizadas, o suposto vidente foi detido e, tras prestar declaracións en dependencias da Garda Civil, quedou en liberdade, pero investigado por estafa e coa obrigación de comparecer ante o xulgado cando sexa requirido.
MODUS OPERANDI
A fraude do vidente comeza coa captación de persoas animicamente desesperadas mediante un anuncio publicitario. Unha vez na consulta, cóbralle 30 euros e seduce ao visitante con algún detalle que lle fai crer na resolución do seu problema, realizando un contrato verbal inicial no que se valora o custo da solución do problema en función da gravidade e a solvencia económica do afectado.
Posteriormente, durante o período de tempo estimado para a solución do conflito, o vidente solicita ao afectado diversas cantidades de para "apostar aos espíritos que lle van a solucionar o problema". O cliente deberá introducir o diñeiro nun sobre que o vidente hermetiza para levar a cabo o traballo acordado, coa promesa de devolución unha vez acabado o traballo.
A suposta estafa consúmase coa non devolución do diñeiro que lle entregan os clientes para realizar as "apostas espirituais", cobrando por iso importantes cantidades de diñeiro en efectivo, e mesmo mediante a percepción de bens inmobles.