Para as autocaravanas mellor Valdecorvos que os terreos de Tafisa, segundo o PSdeG-PSOE
Por Redacción
Os antigos terreos de Tafisa non son un lugar axeitado, segundo o PSdeG-PSOE, para habilitar neles un estacionamento para autocaravanas na cidade. Ese é o proxecto do goberno municipal, pero os socialistas nunha moción que presentarán no próximo pleno propoñen outra opción, a zona de Valdecorvos, na que existen varias parcelas de titularidade municipal ás que non se lles está dando un uso especifico.
Unha delas, de 9.500 metros cadrados e destinada a equipamento publico, ofertouse no seu momento á Xunta para a construción dun novo colexio publico, recordan na moción. Esta opción foi desbotada pola Xunta e dende entón a parcela atópase baleira e carente de uso.
Sitúase na zona norte do polígono, dispoñendo de acceso directo dende a rúa central da urbanización. A distancia ata o centro de Pontevedra é de menos de 15 minutos, polo que entenden que sería unha boa alternativa para este uso turístico.
Os socialistas, segundo o seu voceiro Agustín Fernández, "compartimos a necesidade de dignificar o espazo para o estacionamento de autocaravanas", xa que entenden que se trata dun modelo de turismo aínda sen explotar na nosa cidade e que presenta un perfil "moi interesante".
Pero a parcela proposta polo equipo de goberno para esta mesma fin está destinada a uso hoteleiro, polo que para o PSdeG-PSOE a súa utilización aínda que sexa temporal "é unha declaración de fracaso asumida polo alcalde que os socialistas non podemos avalar".
"É certo que non é doado atopar investimento para a construción dun hotel, pero tamén é certo que o alcalde da cidade non pode renunciar a loitar por dotar a Pontevedra dun espazo hoteleiro do que non dispón e do que se necesita se realmente queremos consolidar á nosa cidade como referente turístico de futuro", sinala o concelleiro socialista.
Aínda que sinala a "bondade" da idea do Concello, Agustín Fernández ve "certa precipitación" do goberno municipal neste proxecto, ao entender que a falta de planificación "impediu estudar outras posibilidades máis axeitadas e que permitirían cubrir os dous obxectivos".
Porén, propoñen que se acondicione esta parcela de Valdecorvos en tanto non se logre a construción do novo colexio por parte da Xunta de Galicia; e instan ao alcalde a impulsar e intensificar as xestións necesarias para favorecer a construción dun hotel na parcela que está destinada para ese uso nos terreos que no seu día ocupou a empresa Tafisa.
Relacionadas:
-
Veciños da contorna de Tafisa piden anular o proxecto dun estacionamento de autocaravanas na zona
Por Redacción |
-
PP e BNG únense para manter o contrato de arrendamento da Praza de Touros
Por Redacción |
-
O estacionamento de autocaravanas terá cabida para 18 vehículos
Por Redacción |
-
O solar de Tafisa dispoñerá dunha parcela para autocaravanas
Por Oskar Viéitez | Creada e actualizada
-
Intensificarán os controis para evitar a pernocta de autocaravanas nos espazos portuarios
Por Redacción |