A APDR solicita participar na elaboración do Plan provincial de residuos
Por Oskar Viéitez
A Asociación pola Defensa da Ría (APDR) ven de solicitar a súa participación na elaboración do plan de xestión de residuos sólidos que a Deputación Provincial de Pontevedra está a elaborar.
Segundo explica Benito Andrade, voceiro do colectivo ecologista, o seu propósito é aportar as súas propostas de cara a "conseguir un modelo de xestión sostible que, mellorando a situación actual, resulte beneficioso para o medio ambiente e para a sociedade".
Na APDR, que se ten mobilizado desde hai moitos anos co obxectivo de favorecer un modelo de xestión de residuos sólidos urbanos sostíble, "somos conscientes de que actualmente a produción de residuos está a ser un dos problemas ambientais máis graves dos que ten a nosa sociedade xa que, directa ou indirectamente, está a provocar esgotamento de recursos, contaminación da auga e da atmosfera, destrución de solos e ecosistemas e destrución e desaproveitamento de materiais útiles".