O PSOE alerta de que Louzán cobra 44.000 euros como asesor do PP na Deputación
Por Anxo Lourido
Rafael Louzán, ex presidente da Deputación, exerce agora como asesor do grupo popular do mesmo xeito que o seu ex xefe de gabinete, Luís Serantes. Ambos reciben un salario de 43.935 euros anuais sen pasar pola institución provincial. Así o denuncia o portavoz do grupo socialista, Santos Héctor, que lamenta a actitude que manteñen desde as filas do Partido Popular polas súas últimas críticas cara ao goberno provincial e á presidenta, Carmela Silva.
Santos Héctor apunta que mentres no últimos oito anos, a oposición non contaba con dedicacións exclusivas; agora, o PP conta con catro salarios para os seus deputados. Luís Aragunde cobra un salario de 60.416 euros anuais, a mesma cantidade que José Manuel Figueroa. Anxo Moldes e José Enrique Sotelo reciben 30.208 euros anuais por estas dedicacións.
Con estas cifras, o portavoz do PSOE sae ao paso das críticas realizadas polo presidente provincial do Partido Popular e vicepresidente da Xunta, Alfonso Rueda, a quen considera "o mamporreiro político de Feijóo".
Entende que os ataques do PP á presidenta da Deputación tanto a través de Rueda como no último pleno municipal de Pontevedra responden a que os populares entraron en pánico ante as próximas eleccións e que pretenden levar a cabo unha campaña de desprestixio dos representantes do PSOE.
O portavoz socialista afirma que a Deputación está a realizar proxectos que contan co aplauso dos alcaldes e por este motivo, Santos Héctor, convidou a Alfonso Rueda a visitar o hospital Montecelo para explicarlles aos pacientes por que está paralizada a ampliación ou que percorra os colexios e centros de saúde para que explique se a Xunta vai investir diñeiro para arranxalos.