Comeza o Entroido pontevedrés con pasarrúas de Madamas e Galáns
Por Redacción
A cidade comezou a vivir as primeiras actividades do Entroido pontevedrés esta fin de semana coa presentación dos entroidos de Galicia. Trátase dunha actividade xa habitual na programación destas festas que pretende amosar aos cidadáns os entroidos tradicionais doutros puntos do país.
Deste xeito, este sábado, as Madamas e Galáns de Cobres do concello veciño de Vilaboa protagonizaron un pasarrúas pola zona máis céntrica
da cidade percorrendo as principais prazas e ofrecendo música e cor ante a atención de numeroso público.
A mostra de entroidos tradicionais continuará o vindeiro sábado, 2 de febreiro, ás 12.00 horas cun pasarrúas dos Volanteiros de Chantada.
O venres 8 de febreiro comezará a semana grande do entroido con degustación de filloas na Praza de Verdura, onde aparecerá o rei Urco acompañado do seu séquito e das comparsas Os Solfamidas , Os da Caña, Clave de Sol, Las Flores del Carnaval, Os Paparrulos, A Esmorga. Todos eles serán recibidos polo alcalde. Tras o acto, chegará o momento da lectura do pregón que dará inicio formal ao Entroido do centenario da morte de Ravachol.