Marea Pontevedra pedirá no pleno que se realice unha auditoría dos gobernos do BNG
Por Redacción
Luís Rei, portavoz da agrupación Marea Pontevedra, reclamará no próximo pleno a elaboración dos pregos técnicos e administrativos para poñer en marcha un concurso público co obxectivo de que se adxudique unha auditoría externa das contas do Concello desde o ano 2000 ata a actualidade, coincidindo cos gobernos de Miguel Anxo Fernández Lores e do BNG.
Rei cuantifica nun millón de euros a indemnización que levará o peche do aparcadoiro Veteris tras a solicitude de execución da sentenza. Desde Marea entenden que ademais do que soliciten os demandantes será necesario indemnizar á empresa de xestión do aparcadoiro subterráneo de cálea Antón Fraguas.
A esta cantidade, o grupo político sinalou que as arcas municipais terán que abonar a Sogama 5.330.575 euros antes de xullo de 2016. E tamén engade outra indemnización pola ocupación do terreo de 6.000 metros cadrados no paseo do río Gafos, unha cantidade que ascende a 5.294.874 euros.
Estas cifras preocupan ao partido político que culpa desta situación á xestión política durante estes máis de quince anos. Luís Rei indicou que Pontevedra é o sétimo Concello menos transparente dentro dunha lista de 110 de toda España.
O portavoz de Marea apuntou que estudaran a posibilidade de que fosen os propios técnicos municipais que realizasen esta auditoría pero refugaron esta opción levaría un volume de traballo difícil de asumir e por tanto, prefiren que o realice unha empresa externa. Rei insistiu en que non se fía do superávit que anuncia o concelleiro Raimundo González e insiste en que é necesario un tempo de exame do modelo de xestión de Pontevedra que, entende, son prexudiciais para os intereses dos cidadáns.
Relacionadas:
-
Tensa comisión de economía na que se rexeitou a petición da auditoría externa das contas proposta por Marea
Por Redacción | Creada e actualizada
-
Satisfacción en Sogama e o Concello ante o acordo que regula o pagamento da débeda
Por Alejandro Espiño & Cristina Saiz |
-
O aparcamento público de Veteris non terá que someterse a tramitación ambiental
Por Redacción |
-
Moreira pon a Véteris como exemplo da "irresponsabilidad de la gestión urbanística del gobierno de Lores"
Por Natalia Puga |