Poñen en marcha unha campaña "o máis masiva posible" para contrarrestar as "medias verdades" de ENCE
Por Alejandro Espiño
Iniciar unha campaña "o máis masiva posible" para contrarrestar as "medias verdades" de ENCE sobre o que significa a súa permanencia na ría. É o obxectivo, segundo avanzou Miguel Anxo Fernández Lores, que se marcan as institucións e colectivos que se puxeron á fronte dunha ofensiva social para evitar a consolidación do complexo industrial de Lourizán máis aló de 2018, data na que vence a súa actual concesión.
Ao encontro que tivo lugar na Casa das Campás para iniciar esta "folla de ruta", acudiron os concellos de Pontevedra, Poio e Bueu -o alcalde de Sanxenxo escusou a súa ausencia por estar en Madrid-, a Deputación de Pontevedra, a Mancomunidade de Montes de Pontevedra, as federacións veciñais Castelao e Teucro ou as asociacións ecoloxistas APDR, Vaipolorío e Adega. Todas elas cun posicionamento claro en contra da continuidade de ENCE e Elnosa.
Fernández Lores, que reiterou que "non podemos permitir que se hipoteque o futuro dos pontevedreses durante 60 anos máis", explicou que esta campaña de comunicación irá acompañada ademais de indicadores que mostren o "positivo" que sería para a ría a recuperación do espazo marítimo terrestre que ocupan en Lourizán dúas empresas que "xeneran certo rechazo e destrúen máis emprego do que crean".
Fernández Lores lamentou que en Pontevedra "levamos 60 anos sufrindo unhas fábricas que se instalaron a punta de bayoneta"
Así, elaborarase un "libro branco" que recolla os proles e os contras de contar con ENCE na ría e os aspectos "positivos ou negativos" de recuperar a ría para usos marisqueiros e turísticos "para ter toda a información máis directa e fácil de entender". Neste sentido, prevense organizar mesas redondas e charlas, repartir carteis e merchandising ou contar con intervencións de artistas plásticos e culturais que "visualizarán a ría sen ENCE"
O alcalde insistiu en que "estamos cansos das medias verdades que di ENCE sistematicamente", sobre todo por mor da campaña que "leva facendo nos últimos anos para cambiar a súa imaxe". Fernández Lores foi máis aló e lamentou que en Pontevedra "levamos 60 anos sufrindo unhas fábricas que se instalaron a punta de bayoneta" e mostrou o seu convencemento de que "viviriamos moi ben sen ENCE".
FELIX JUNCAL CITA ASPECTOS "NOCIVOS"
Pola súa banda, o alcalde de Bueu afirmou que a continuidade de ENCE en Lourizán non debe ser unicamente un debate político e institucional, senón que "debe ser a sociedade a que decida o futuro" do complexo industrial. Na súa opinión, "queremos que se traslade", algo que entende sería "perfectamente compatible" co mantemento dos postos de traballo.
Pensando nos habitantes do seu municipio, Félix Juncal mostrou a súa preocupación non tanto pola repercusión económica da empresa senón en cuestións ambientais. "Hai uns efectos nocivos para a saúde das persoas que desde hai moitos anos temos interiorizado e temos o deber de cambiar esa situación", dixo. Chegou a vincular, citando estatísticas, a relación "directa ou indirectamente" do complexo industrial coa prevalencia de diferentes enfermidades.
Relacionadas:
-
Lores ve como "un paso máis na estratexia do PP" o aval da Xunta á Autorización Ambiental de ENCE
Por Diego Espiño |
-
Tapan a publicidade de ENCE en escaparates comerciais con 'post-it' contra a súa permanencia
Por Redacción |
-
Ence acusa a quen reclama o traslado da fábrica de lanzar unha mensaxe "populista y demagógica"
Por Oskar Viéitez & Cristina Saiz |
-
A oposición acusa a Feijóo no Parlamento galego de actuar "en conivencia" con Ence
Por Redacción |
-
A APDR volve vestir as estatuas da cidade con carteis reclamando a marcha de Ence
Por Redacción |
-
Ence Pontevedra insiste en que supera "folgadamente" as esixencias ambientais
Por Redacción |
-
Remata sen incidencias a intervención dos traballadores de Ence no pleno municipal
Por Cristina Saiz & Anxo Lourido |
-
"Ao final están a demostrar que durante moitos anos non fixeron nada", di o alcalde sobre Ence
Por Oskar Viéitez |