Retiran a imputación por prevaricación contra a exalcaldesa de Sanxenxo, Catalina González
Por Redacción
O Xulgado de Instrución número 2 de Cambados retirou a imputación contra a exalcaldesa de Sanxenxo, Catalina González, á que investigaba por prevaricación na concesión de licenza municipal de primeira ocupación a tres chalés en Bascuas, promovidos pola empresa Caneleiro Inversión.
Segundo informou o Tribunal Superior de Xustiza de Galicia, Catalina González foi imputada en 2013, xunto a técnicos e responsables municipais de Urbanismo, por irregularidades en tres causas, relativas á construción dun bloque de vivendas sen acceso propio no centro e dúas promocións de chalés nas zonas de Bascuas e Dorrón.
González xa foi eximida de responsabilidade no caso do edificio de Sanxenxo e agora pasa o mesmo co dos chalés de Bascuas, á espera de que se concrete a súa situación respecto dos de Dorrón.
O auto do xuíz conclúe que "non existen indicios obxectivos e sólidos" que permitan seguir mantendo a imputación á ex rexedora.