O sábado regresa o verán, por fin
Por Oskar Viéitez
Aqueles aos que se lles estea a esgotar a paciencia co tempo destas últimas semanas saiban que, segundo MeteoGalicia, o sábado marchan as nubes e haberá un día de sol, calor e ceos despexados. É dicir, regresa o verán na súa versión máis típica de sol e praia.
Mentres tanto, este venres o tempo segue con esa indefinición, coas altas presións en superficie e o aire frío en altura facendo que continúe a inestabilidade.
Que non cunda o desalento, Meteogalicia prognostica que na xornada do sábado o aire frío en altura se afasta de Galicia e comezarán a entrar as altas presións, permitindo que as condicións estables predominen sobre o país.
Será un día con predominio dos ceos despexados en xeral, con algunhas nubes pola maña no norte e algún banco de néboa matinal en zonas do interior. As temperaturas mínimas descenderán mentres que as máximas se manterán sen cambios ou ascenderán lixeiramente. Os ventos soprarán do nordés con intervalos moderados entre Bares e o norte das Rías Baixas.
E para o domingo, os técnicos aseguran que continua a estabilidade na columna atmosférica sobre Galicia. Isto fará que predomine o ceo pouco anubrado ou despexado en xeral durante todo o día, agás algunhas nubes pola mañá e néboas costeiras no litoral atlántico e un incremento das nubes no noroeste pola noite.
As temperaturas, tanto mínima como máximas, estarán en ascenso. O vento soprará de sudoeste frouxo durante o día e pola noite rolará a compoñente sur.